معلش احنا بنتكلم

خالتي بهانة واللومنجي والواد رِف وضعوا الخطط الجهنمية للكرة المصرية من أول (أبو لمعة) اللي شاط الكورة في ملعب السكة الحديد ووصلت كفر المعزة حتى (إبراهيم سعيد) اللي بيحط على شعره مرة كاتشب ومرة ملوخية!! وخالتي بهانة يا سادة هي اللي جعلت الشيخ طه إسماعيل يبدل أرقام فانلات اللعيبة في جمهورية فيحان العظمى عشان البخت والخطة وشدي حيلك يا بلد.. وبعد الهزيمة قالوا: الطقس والحكم والملعب والجلدة والفلتر.. حتى جاء الحاكم بأمره محمود بن جهرون الذي شقلب الترويسة ودوري السيجة ونظام الانحراف ــ الاحتراف سابقاً ــ وجعل من الواد شحاتة بن الحاجة نعناعة كابتن قد الدنيا بيضحك على البيض والحُمر ويلهف البكاوي والأساتك والقانون لا يحمي المدربين ــ اللي تاعبين نفسهم في دوري الكورة المصري وهم أول العارفين إن الدوري زي الأفلام العربي في النهاية البطل للبطلة والدوري في الجزيرة ، وعشان كده خالتي بهانة بعتت مكتوب للدهشوري حرب 67 بأن يرسل فريق الكورة بتاع الأهلي في قطار الصعيد.. عشان الدوري يبقى مفلفل وله طعم ، ومنها نخلص من الأهلي ببركات القطر... ومنها الزمالك ينافس على المركز الثالث. ولكن سمير بيه زاهر رفض اقتراح خالتي بهانة واتهمها بالخيانة الكروية وقلب نظام الملوخية من أجل العراسيب التـي قحقحت في السجيم لتلاحم قوى الدوري العامل والكفاح المتفشي من أجل رفع راية الكورنر وعلشانك يا مصر.. واللي فاهم حاجة يسأل اللي مش فاهم، واللي مش فاهم يروح للدكتور اللي حماره غُلب مع المدربين وعقدة المركز الثاني فأرسل الواد الفتوة بتاع حجرة الملابس للعرافة الكبيرة أم خالتي بهانة من أبوها من الرضاعة الريري كمان عشان تعمل له حجاب في حجم الكورة اللي فاتت من بين رجلين عبدالواحد وتعمل حجاب لكل لاعب في الفرقة وواحد على باب النادي عشان يبعد مرتضى منصور ، ولكن أم خالتي بهانة طلبت وأصرت وألحت على حضور الدكتور بنفسه وجاء الرجل يجر أذيال المركز الثاني ويتمتم : إن كنت أعزّ عليك فخذ بيديّ .. فأنا مقهور من رأسي حتى قدمي.. فقاطعته أم خالتي بهانة : مقدورك أن تبقى في المركز الثاني، لكن أنا مش هسكت وهعمل لك عمل ما يخرش المية يخلي الخطيب يصبح زملكاوي وثابت يحب شوبير والزمالك يطلع من محطة المركز الثاني .. لكن فين يا دكتور أنا مش عارفة .. لأن زحل دخل في المشترى وعطارد بيبكي على وليد صلاح الدين .. لكن كل مصيدة تسلل لها مصطفى عبده، وكل شبكة ولها حسام.. بس مش حسام بتاعكم اللي بينط لتحت.. وما عليك إلا أن تجيب ورك سمكة حامل وعرف ديك أحول وريشة من حمامة دنشواي وشعرة من رأس الرجال الصالح وضفدعة من بحر الغزال وورقة التوت بتاعة النظام العالمي الجديد وخيطة من فستان مونيكا وحبهان ومستكة وودن جراد دكر ونملة عندها شلل أطفال ، ثم تخلطهم ببعض في حلة هندي وتصب فوقهم ماء من النيل قبل ما يتلوث وتترك الحلة على نار الشمعة 6 سنين عدد مرات فوز الأهلي بالدوري على بعض ثم تلحس الحلة بلسانك على الريق في يوم 30 فبراير من كل سنة وبعدها تبخر المدرب كابتن ليفة ببخور أسواني وهو اللي هيجيب بنفسه العمل ويحرق الحجاب اللي مخلي الأهلي بياخد الدوري والأهلوية حاطينه في حمّام الفيفا .. فابتسم الدكتور بعد أن عرف السر الخطير وأقسم برأس مرتضى منصور أن يفضح الأهلوية في مجلس الأمن ودول مالهاش دعوة ببعض ، وفي المجلس الأعلى لجمهورية زفتى وجمهورية شبين وجمهورية شبرا، وأنه سيذهب إلى أستونيا ومزارع دينا ليكشف السر ، وسوف يرسل المدرب خازوق الرايق الشهير بكابتن ليفة إلىدورة مياه الفيفا ليأتي بالحجاب ويشد السيفون.
وقبل ما الكابتن ليفة يسافر الفيفا .. كانت الست مرجانة زوجة علي بابا وبنت الشيخ (ملاّكي) وخالة سمنة المعزتين .. عنده في البيت .. وحلفت براس الدهشوري حرب 67 .. أن أم خالتي بهانة عرافة نصابة وعميلة لجمهورية الخوف والكيت كات ووراق العرب وجهاز مخابرات القارة القطبية ومؤسسة (إف. إخص. دبليو) وحمّام التلات .. وجامعة الباطنية .. ومعهد العسّال والورشة بشبرا.. وأنها تعرف الحقيقة المرة .. والحقيقة بتاعة أحمد بدير في ريا وسكينة .. والحقيقة (البرافدا) في روسيا وحقيقة ثورة جمال عبدالناصر والأربعين حرامي.. وأن عطارد متعامد على (طرنشات) شارع ناهيا ومجاري عزبة النخل ، وزحل رايح ناحية (ميت عقبة) ، وكوكب المشترى طالب حق اللجوء العاطفي عند جامعة الدول العربية ، وأن إبراهيم عثمان لابسه جن أبيض شرس وحسن حمدي جاب الأهرام والأهلي البيت وخلاص هيجيب نادي الصيد.. والسر يا كابتن ليفة اسمه (حسام حسن) والجن الأزرق بيقولك: لو تجيبوه هتاخدوا البطولات.. وإن سابكم هتغنوا ظلموه.. والدوري معلّق في رباط الجزمة .. ومن غيره مالكمشي لازمة.. وسيبك من بهانة أم قُصّة ولبانة.. دي أصلها عضوة في الحزب الوطني .. والحداية ما بترميش كتاكيت
ولا حتى فيران..
واللي يحب النبي يزق.. ورقصني يا زمن بتوع الكورة